فاكرة يا مصر!!!
فاكرة الدمعة يوم فراقك...
فاكرة خبطي ع بابك...
فاكرة يا مصر!!!
فاكرة يوم ما نقشت على ترابك...
و كتبت أسمي و الباقي عنوانك...
فاكرة يا مصر!!!
يوم ما قلتي و سمعت كلامك...
أن أمضي...و أبحث عن ذاتك...
بس لا في يوم تنسي...و أفتكرني في منامك...
فاكرة يا مصر!!!
علي ناصية شارعنا و الوقت كان زمان...
بياع البليلة و الناس الاصيلة و حبة حنان...
و صحبه حلوة و قعدة رصيف...
و طعمية سخنة في شقة رغيف...
و حصة جغرافيا و كتاب التاريخ...
فاكرة يا مصر!!!
لما قلتي هتبقي جندي ووتتعلم تذود...
هتبقي دفعة...فرد واقف على الحدود...
لما قلتي...
عيش زي الاسود مش مجرد نمرة وسط الحشود...
قوم رد الحسود...كمل عمل الجدود...
أثبت...و متعملش زي القرود...
فاكرة يا مصر!!!
فرحة اجازة في يوم الخميس...
و زحمة شوارع و زفة عريس...
مسارح و سيما و سيرك و قفيش...
و كارتة مخالفة كتبها الشاويش...
تكية بهية و كشك السعاده...
و دمك يا حلوة سكر زيادة...
تذاكر يا هانم تذاكر يا بيه...
و حكاوي الدنيا بريع جنيه...
و تسأليني في الغربة ضاع مني إيه...
و ايه اللي عندك بتبكي عليه...
تذاكر يا هانم تذاكر يا بيه...
عجيبة يا مصر عجيب العجاب...
فيكي الاهل و فيكي الصحاب...
عجيبة يا مصر عجيب العجاب..
قريبة بعيدة وما من عتاب...
عجيبة يا مصر عجيب العجاب...
و كم ذكرى حلوة و حبة تراب...
تذاكر يا هانم تذاكر يا بيه...